19.06.2016 தீக்கதிரில் என் படைப்பு

                    ஊர் வாய்

வாயாடிச் செருக்கி அவ
வக்கீலுக்குப் படிக்கிறாளாம்!
வடிச்சு  கொட்டப் போற கழுதை 
படிச்சு என்ன கிழிக்கப் போறா?

கோயிலுக்குப் போக மாட்டா!
கோலங்கூட  போட மாட்டா! 
தீட்டு பட்ட நேரத்திலும் 
தூரம் தள்ளி இருக்கமாட்டா!

பொண்ணா லட்சணமா
பொறுமையா பேச மாட்டா! 
அச்சம் மடம் நாணத்தோட 
அடக்கமா சிரிக்க மாட்டா!  

மூத்தவக பெரியவக 
முறையுள்ள மாமனுங்க 
கிண்டல் கேலி பேசிப்புட்டா
ரெண்டில் ஒன்னு பாத்துடுவா!

சீமைத்துணி உடுத்துறா
சீர்திருத்தம் பேசுறா!
நேரங்கெட்ட நேரத்துல 
ஊருவந்து சேருறா!

இப்படியே இருந்தாக்கா
இவளை எவன்  கட்டிக்குவான்?
எனக்கென்ன தோணுதுன்னா
எவனையாச்சும் வெச்சிருப்பா!

அப்பன்காரன் செவப்பு சட்டை
அவங்கொடுத்த தைரியந்தான்
போராட்டம் கூட்டத்துக்கும் 
பொண்ணையும் கூட்டிப் போறான்!

காலங்கெட்டு கெடக்குதுங்க
கலி முத்திப் போச்சுதுங்க
ஆயிரந்தான் இருந்தாலும்
ஆணும் பொண்ணும் சரிசமமா?

என்னென்னவோ சேதி சொன்னா
எல்லாமும் சரிதாங்க!
பொட்டச்சி பேச்சை கேட்டு  
பொறுத்துக்கிட்டா  ஆம்பளையா? 

இருபத்தொன்னாம் நூற்றாண்டிலும் 
இப்படித்தான் ஊர் பேச்சு!- இந்த
ஆணாதிக்கம் மாத்தலையே 
அம்பது வருஷ ஆட்சி!

                                        வரத.வசந்தராஜன்
                                       நன்னிலம்.

கொரானா பாடல்

எந்தச்சாதி எந்தமதம் கேக்கவுமில்ல
ஏழைபணக் காரனென்று பாக்கவுமில்லை
எல்லோரையும் சரிசமமா தாக்குதுங்க கொரானா
வெள்ளிக்காசை சல்லிக்காசா மாத்துதுங்க கொரானா!

தாயிபுள்ளை தூரமாகிப் போச்சு பாருங்க
நோயுங்கூட உலகமயம் ஆச்சு பாருங்க
வீட்டுக்குள்ள அடங்கணுமாம் அரசு சொல்லுது
வீதியில முடங்கும் கூட்டம் விதியை எண்ணுது!

ஊரடங்கு போட்டதுமே வயிறு அடங்குமா
பசியடங்க மாத்திரைகள் போட முடியுமா?
அன்னாடங் காய்ச்சிகளின் அழுகை தீருமா
அரசாங்க காதுகளில் கதறல் விழுகுமா?

நோட்டுதந்தா ஓட்டு போடும் மந்தைகளாக
போட்டமுதல் மீட்டு தரும் சந்தைகளாக
விழிப்புணர்வு இல்லாம சனங்க வாழுது
விலகமறந்து வீதியிலே  கூட்டம் கூடுது!

விஞ்ஞான சாதனைகள் மண்ணைக் கவ்வுது
விண்ணாளும் ஏவுகணை பல்லைக் காட்டுது
வல்லரசு நாடுகளும் வாயைப் பிளக்குது
வாங்கிவெச்ச ஆயுதத்தை எடைக்குப் போடுது!

கடவுளெல்லாம் ஓடிப்போயி கதவைச் சாத்துது
கதையளந்த கூட்டம்பாரு இழுத்து போத்துது
ஒட்டுமொத்த பூமியுமே பயந்து நடுங்குது
சோஷலிச அரசுதாங்க கையில் தாங்குது!

மருந்துவர்கள் எண்ணிக்கையை அதிகம் ஆக்குது
மருந்துகளை அரசுடைமை ஆக்கி வைக்குது
கடைக்கோடி மனுசனுக்கும் கல்வி மருத்துவம்
இலவசமா கிடைக்கும்படி சட்டம் வகுக்குது

மனுசனுக்கு அனுபவந்தான் பாடம் நடத்துது
மகத்தான தத்துவத்தை சொல்லி கொடுக்குது
வரலாறு முழுவதுமே வர்க்கப் போரடா?- இந்த
வல்லூறு கூட்டமினி சுக்கு நூறடா!
                          -வரத.வசந்தராஜன்