வயல்வெளி காதல்

பெண்: 
ஆத்துமீனை பாக்கும்போது அடிமனசில் நூறுஆசை
சேத்துமடை கெளுத்தியாட்டம் குத்துகிற மாமன்மீசை
சோத்துப்பானை கரியைப்போல சொக்கும்நெறம் அமாவாசை
நாத்துவீச வாரீகளா நடவுமறந்து நானும்பேச?

ஆண்: 

வரப்புமேல நீநடந்தா வழுக்குதடி என் மனசு
செருப்புமறந்த பாதத்துல சிணுங்குதடி பூங்கொலுசு
கருத்தநெறம் மாறட்டுமே செவத்தபுள்ள நீயுரசு
கழுத்துமணி நுனியிலதான் கட்டழகே உன்மவுசு!

பெண்:
வெவரமான ஆளுநானு விவகாரம் பேசாதீக
விலைபேசி வம்பைவாங்கி வில்லங்கம் சேக்காதீக
தாலிகட்டும் முன்னாடியே கேலிபேச கூடாதுங்க
வேலிபோட்டு விரட்டினாலும் வெள்ளாடு ஓடாதுங்க! 

ஆண்:
அத்தைமக முறையிருக்கு ஆனாலும் பயமிருக்கு
ஆடிப்பட்டம் வெளஞ்சிருக்கு  தைபொறந்தா வழியிருக்கு
மத்தாட்டம் கடையத்தானா மவராசி விழியிருக்கு 
பித்தாட்டம் அலையுறேன்டி போகலயே மனக்கிறுக்கு!

பெண்:
பருத்தியெடுக்கும் வயலுக்குள்ள வெடிக்குதய்யா புரளியொன்னு
பனைமட்டை கருக்கைப்போல அறுக்குதய்யா ஊருகண்ணு
நெனவுதெரிஞ்ச நாள்முதலா உனக்காக வாழும்பொண்ணு
கனவுகண்டு காத்துகெடக்கேன் கைபிடிக்க வரணுமின்னு!

ஆண்:
விண்ணைவிட்டு வெள்ளிநிலா மறைஞ்சுபோகும் ஆனாலும்
தென்னைபட்டு கூடுவிட்டு கிளிபறந்து போனாலும் 
உன்னைவிட்டு நான்பிரிஞ்சு உசிருவளர்க்க மாட்டேன்டி
தண்ணிவிட்டு மீனுவாழ்ந்தா தங்கமேநீ காட்டேன்டி! 

இருவரும்: 
விதைநெல்லு சாட்சிவெச்சு வெத்தலையும் பாக்குவெச்சு 
ஊரெல்லாம் கூட்டிவெச்சு ஒருநாளு பாத்துவெச்சு
நீயும்நானும் சேரப்போறோம் நெனச்சபடி வாழப்போறோம்
பாயும்தல காணிபோல பிரியாம இருக்கப்போறோம்!
          வரத.வசந்தராஜன்