காவி ராஜ்ஜியம்

நேத்துநடு ராத்திரியில் கெட்ட கனவுங்க
பாத்தகதை வேறெங்கயோ கேட்ட நினைவுங்க!

அமெரிக்காவின் கோவணத்தை வெளுத்து கொடுக்குறான் -அதன்
அழுக்குநிறம் காவியின்னு பெருமை பீத்துறான்!
தமிழ்நாடு வந்தப்பொருளை தடுத்து நிறுத்துறான்
தலையாட்டி சலாம்போட்டு தாவிக் குதிக்கிறான்!    
                                                             ‌ ‌ (நேத்துநடு)
வழிப்பறி திருடனுக்கு வழியை சொல்லுறான் வல்லூறூ பசியடங்க உயிரை கொல்லுறான்
காலமெல்லாம் அடிமையாக இருந்து பழகுறான்
காலணியில் தேன்தடவி விழுந்து தொழுகுறான்!
                                                             ‌ ‌ (நேத்துநடு)
நாடாளும் மன்றத்துக்கு கோடி ஒதுக்குறான்
நாட்டைக்கெடுத்த பேர்களுக்கு சிலையை வைக்குறான்
நாலஞ்சு லட்சத்துல கோட்டு தைக்குறான்
நிவாரணம் கேட்டாலே நீட்டி முழக்குறான்
                                                             ‌ ‌ (நேத்துநடு
பெத்தபுள்ள சோத்துத்தட்டை எட்டி உதைக்கிறான்
மத்தவங்க ஊட்டவந்தா முட்டி விரட்டுறான்
மனமிறங்கி உதவினாலும்  தடையை போடுறான் -அடச்சே
மனசாட்சி இல்லாம பெருமை‌ தேடுறான்!                                                         
                                                             ‌ (நேத்துநடு)

அடிமையாக பழகுனவன் முதுகு நிமிருமா?
அறிவுரைகள் கேட்டுநாய் வாலு நிமிருமா?
தேசப்பற்று பேசுனவன் வாய் மலருமா? -இல்ல
தேர்தலுக்கு மட்டும்தான் நினைவு திரும்புமா?
                                          -வரத.வசந்தராஜன்