ஆங்கில மோகம்

அக்கம் பக்கம் வீட்டிலுள்ள
ஆளு யாரு தெரியலே
அமெரிக்காவின் அதிபர் பேரை
பட்டுன்னு சொல்லுது பயபுள்ள!
அரிசி எப்படி வெளையுதுன்னு
அப்பன் காரன் சொல்லல
கல்லா கட்டும் ஏற்பாடுதான்
கான்வென்டு ஸ்கூலுல!

மார்க் வாங்கும் எந்திரமாக
மாணவனை மாத்துது
பணம் காய்க்கும் மரத்தைப் போல
பெத்தவனை பாக்குது
வெளி நாட்டு வேலையின்னு
ஆசை வார்த்தை காட்டுது- கள்ளச் சாராயம் வித்த ஆளை
கல்வித் தந்தை யாக்குது! (அக்கம் பக்கம்)

தாய் மொழியே தெரியவில்லை
ததிங்கினத்தோம் போடுது
ஆங்கி லத்தில் மட்டுமென்ன
அரைகுறையா தேறுது!
அய்யோ பாவம் ஆமைக்குஞ்சு
ஓட்டப்பந்தயம் ஓடுமா?
கட் டெறும்பைக் கடலில்விட்டா
கரைக்குவந்து சேருமா? (அக்கம் பக்கம்)

அரசுப் பள்ளி பிள்ளையைபாரு
அம்மாம்பேச்சு பேசுது
கான் வென்டில் படிச்சபுள்ள
அம்மாஞ்சியா முழிக்குது
நாட்டுக் கோழி வீரியம்பாரு
நரியைக்கூட துரத்துது
சிறகை வெட்டி பருந்துவளர்த்தா
கோழிகூட கொத்துது (அக்கம் பக்கம்)

அம்மா அப்பா கனவுதிணிக்க
பிள்ளை குப்பைக்கோணியா?
அவரைச் செடியில் ஆப்பிள் பழுக்க
ஆசைப் படும்பாணியா?
வெள்ளைக் காரன் மொழியைப்பேச
விரும்புறது தவறில்ல!
வெள்ளைத் தோலும் வேணுமின்னு
வெந்துபோனா சரியில்ல! (அக்கம் பக்கம்)

-வ.வசந்தராஜன்
நன்னிலம்